Alveg ný lífsreynsla

Það mætti halda að ég væri að verða vitlaus!
Ég veit ekki hvað þetta er eiginlega með mig þessa helgina. Ég er bara hálfur maður. HK er nefnilega búin að yfirgefa mig. Nei ekkert alvarlegt heldur þurfti hún bara í þjálfunarbúðir á fjöll til að læra betur að bjarga jólajeppum eins og mér.

Ég var sem sagt bara einsamall í gærkvöldi og ég er ekki lengur viss um hvort ég þoli þessa einveru sem kemur glöggt fram á myndinni hér að ofan. Ég man ekki hvort þetta var þannig að þegar ég var að bursta tönnurnar í mestu makindum að þá áttaði ég mig á að ég var í sturtu og hafði ruðst inn á mig sjálfan eða hvort það var þannig að ég var í sturtu í mestu makindum þegar ég sjálfur réðist inn á mig í baðherbergið og fór að bursta tönnurnar eins og bara ekkert væri sjálfsagðara...

Nei ég er greinilega að missa vitið!

Annars er ágætt að vera einsamall á stundum svo framarlega sem það kemst ekki of mikið upp í vana... og HK kemur nú aftur ekki seinna en á sunnudagskvöld og þá verður væntanlega kátt í höllinni!

Það var annars ágætt í dag. Þvældist eitthvað með myndavélina mína og svo var ammæliskaffi hjá Ralldiggni. Var leystur út með geisladisk sem ég er að hlusta á og er hinn maklegasti.