Í músahúsi mega þröngt sáttir sitja

Úti var rigning, inni voru eitthvað tæpir 10 fermetrar... þar var þurrt á meðan ekki var gusað úr glösum í allar áttir hvar þröngt máttu sáttir sitja í græna Músahúsinu. Sjaldan hafa svo margir verið innandyra í Músahúsi í einu og aldrei svo margir að borða þar. Gekk þó allt stórslysalaust fyrir sig. Hrefna Vala reyndar datt ofan úr koju - bara neðri koju - meiddi sig ekkert þannig séð en það gusaðist rauðvín eitthvað út um allt. En það var bara ágætt.

Byltan tveimur dögum seinna varð verri þegar bloggarinn rann á sleipum gólfbita, fór úr axlarlið og braut bein.

-----
Eftirá innfærð bloggfærsla en var upphaflega á FB síðunni minni að hluta.

Afrakstur sultusuðu næturinnar.

Sunnudagurinn 6. júlí var dálítið sérstakur. Eftir að hafa lesið eitthvað jarðfræðidót fram eftir degi og skokkað smávegis í Heiðmörk, aðallega til að komast að því að kálfinn er ekki ónýtur þá var farið út í garð.

Ætlaði ekkert að gera neitt merkilegt í garðinum en endaði einhvern veginn fór það þannig að innihald safnhaugskassanna var forfært fram og til baka. Gaus þá upp frekar vondur fnykur og leist mér ekki á blikuna þegar konan í næsta garði sagðist ekki lengur geta verið úti því það væri komin svo mikil kíkalykt.

Eitthvað náði ég nú að koma þessu inn í kassann aftur og vona að fnykurinn sé þar lokaður inni en þarf greinilega eitthvað að skipuleggja betur þessi safnhaugamál.

En... ég tók líka inn rabbarbara sem var þarna við safnhauginn og fékk þessa líka frábæru hugmynd að gera mér rabbarbarasultu. En þá vantaði sykur. Í stað þess að fara að fá mér að borða þá var farið út í bíð að kaupa sykur og svo var hugmyndin að elda mat á meðan sultan myndi malla. En þá tók dagurinn aðra óvænta stefnu. Sem ég nálgaðist Skeifuna því ég ætlaði í hagkaup þá sá ég að eldgos var hafið í Skeifunni. Eftir að hafa fylgst með eldsvoðanum í meira en klukkutíma kom björgunarsveitarútkall til reka almnenning eins og mig sjálfan í burtu.

Var auðvitað ekki með nein björgunarsveitarföt með mér en fékk lánaðan stakk af Kjartani Óla sem er svona 20cm lægri en ég. Það var ágætt og ég stóð vörð fram undir miðnætti.

Þá var farið heim til sultugerðar og eldamennsku. Eldamennskan var einföld en fólst bara í að hita upp einhverja grýtukássu frá deginum áður. Sultugerðin var líka einföld. Bara skera rabbarbarann niður og setka sykurinn með og sjóða svo.

En ég sauð og sauð en sultufjandinn þykknaði ekki neitt. Fór svo bara að sofa um miðja nótt en lét sultuna malla áfram.

Undir morgun eða þar um bil vaknaði ég aftur. Dauðhreinsaði krukkurnar upp á nýtt og hellti sultunni á sam mér fannst vera orðin mátuleg og alveg rosalega góð á bragðið.

Sofnaði svo aftur og fékk mér brauð með sultu í morgunmat. Mikið rosalega var hún annars vegar góð en hins vegar hroðalega þykk!

-----
Var upphaflega á FB síðunni minni en fært hingað með dagsetningu skráningar þar.

Slappur tappi

Upp og niður á Eyjafjallajökli um sumarsólstöður 2014. Bara brattur á leiðinni upp fyrstu brekkuna en svo skömmu seinna frekar súr á leið niður aftur einsamall með sinadrátt eða slit í vöðva. Vonast samt það besta. Daginn eftir talsvert að skána!
-----
Var upphaflega á FB síðunni minni en fært hingað með dagsetningu skráningar þar.

Raunir mastersnemans

Raunir sýnatökumannsins að stíga sín fyrstu skref í Undirhlíðum. Þarna má telja eitthvað um 10 göt en það komu einungis 2 nothæfir kjarnar úr þessu til segulmælinga. Þar af annar kjarninn í pörtum og þurfti UHU lím til að bjarga honum. Bólstraberg með öllum sínum sprungum er ekkert alveg það sem best til að bora í!
-----
Var upphaflega á FB síðunni minni en fært hingað með dagsetningu skráningar þar.

Páskar

Ungi litli kominn í fuglahúsið í garðinum!

Það ríður ekki við einteyming hvað maður þarf að gera þegar það á að vera að lesa fyrir próf - og taka próf á sama tíma. Bjó til myndasögu um aumingjans páskaungann sem var frekar ósáttur við það að eggið skyldi ekki vera étið heldur bara spekúlerað í málshættinum.

Myndasýningin er með æfintýrasögunni á fésbók.

Ný græja í eldhúsið í Hæðargarðinum!

Nú verður kaffi malað af andans list... lyst :-)

Próflestrarblogg

Veit svo sem ekki hvað ég ætla að skrifa en er bara að lesa fyrir próf á sama tíma og ég er að taka annað próf og búinn að vera eiginlega veikur líka allan tímann. Það er ekkert of gaman.

Það sem helst er markvert allt það sem á að gera þegar þessi leiðinda próf eru búin. Þar má nefna að það á að fara að mastersverkefnis sesgulmæla. Væntanlega fyrst mælt í námu í Undirhliðum sem líklega ekki allir vita hvar en er er nú bara á Hafnarfjarðarleið upp í Bláfjöll. Mun mæla þar í bólstrabergi. Sést t.d. á myndinni að neðan. Þar sjást tvær bólstrabergssyrpur með lagi á milli. Hefði fyrirfram haldið að lagið á milli væri bara móberg en er ekker tof viss um það. Leit meira út eins og mjög fínkorna set. Hmmm þarf að skoða betur!

Bólstraberg ofan og neðan lags í námu í Undirhliðum á Reykjanesi

Já og svo má alveg minnast á veðrið sem er ekki par gott. það var komið vor hér einhvern tímann um daginn en það virðist alveg vera farið veg allrar veraldar. Búinn að vera hríðarhraglandi núna í marga marga daga!

Norðlendingurinn hýmir úti og furðar sig á af hverju þetta vor fer ekki að koma almennilega

Þessi slappleiki annars sem er að hrjá mig byrjaði fyrir svona 2 vikum. Svo fyrir svona 10 dögum þá var ég kominn með snert af eyrnabólgu á sama tíma og ég var að kenna á námskeiði hjá Endurmenntun um innri úttetktirnar okkar Kjartans. Var hálf framlágur þar. Er svo búinn að vera með hellu í eyranu síðan - og orðinn þokkalega þreyttur á því þó hún fari eitthvað minnkandi. Einar frændi læknir sagði mér að ég yrði bara að blása eyrað mitt út. Ekki fer ég að setja rör í eyrað!