Er verið að spá vondu veðri

Versta veðurspá í áratugi?

Það er farið mikinn því von er á versta veðri síðan 1991 segja veðurfræðingar sem ljúga ekki - eða hvað? Kortið að ofan sýnir ástandið líklega þegar veðrið á að vera hvað verst og það er vont en samt kannski ekki alveg eins vont og talað er um.

Það er vissulega gert ráð fyrir rosalegum vindi á suðurlandi sem sést líka á næsta korti. Þ.e. gera má ráð fyrir vindhraða um eða yfir 40m/s undir Eyjafjöllum. En það er svipað og mig minnir að hafi orðið í febrúar síðasta vetur.

Það er hins vegar helst verið að bera þetta veður saman við veður sem varð 1991 sem er mesta rok sem ég man eftir í Reykjavík. Þá fauk margt. Tré rifnuðu upp, svalir fuku af húsum og einhverjir bílar eflaust fuku þó hið eiginlega Engihjallaveður hafi líklega verið 10 árum fyrr. En ef skoðað er hvernig spáin er fyrir hana Reykjavík núna þá sýnist mér að Reykjavík muni að mestu leyti sleppa við versta veðrið.

Þ.e. fer mest í um 20m/s í stærstum hluta Reykjavíkur. Ég myndi því ekki gera ráð fyrir neinu neyðarástandi í bænum. En það verður hins vegar hvassara á Kjalarnesi - en fólk þar er vant mun meiri vindi en í hinni upphaflegu Reykjavík.

Það er vetur

Ætli það sé ekki nákvæmlega ein vika síðan. Það byrjaði að snjóa. Fyrst bara frekar lítið þannig að mér fannst upplagt að fara út að fjallahjóla í snjónum. það var gaman. Daginn eftir var kominn hellings snjór - eða svo fannst mér þá. Það var líklega föstudagur. Þá var jólagleði í Staka. Ég var ekki lengi þar sem ég átti eiginlega að vera að taka próf - þriggja vikna heimapróf - tvær vikur búnar og ég ekki byrjaður á neinu.

Á laugardeginum var svo allt komið á kaf í snjó - eða svo hélt ég. 20cm jafnfallinn snjór í henni Reykhavík eða kannski var það eitthvað meira. Fór á gönguskíði með Gunnanum í Heiðmörk. Það var gaman og svo var ég að reyna að byrja að skrifa fjárans grein sem þetta heimapróf á að snúast um. Það var ekki jafn gaman. Valdi mér að skrifa um öskufall - það ætti auðvitað að vera gaman!

Á sama tíma hafði ég til að dreifa huganum helst til mikið óvæntan áhuga manneskju úr óvæntri átt. Kannski meira um það seinna. Gafst loks upp á því í bili - enda kominn langleiðina með að klúðra þessum prófum núna endanlega.

Frekar undarlegt að fyrir einu ári var ég að berjast í heimaprófi og þá var ég í alvörunni að reyna að ná 10 og varð ekkert of glaður með að fá bara 9.5. Núna er mér allt í einu eiginlega slétt sama hvað ég fæ. Veit ekki alveg hvað gerðist en einhvern veginn varð mér allt í einu bara dálítið sama um þetta í bili. Kannski það að há einkunn er bara tala á blaði - sé ekki að það skipti máli út fyrir það - veit svo sem ekki alltaf út af hverju ég er að þessu!

Sé annars eftir á að kannski er málið að mér finnst ég ekki hafa lært svo mikið í þessum kúrsum - þarf því ekki að sýna fram á með einhverri einkunn að ég hafi staðið mig vel - þar sem ég í rauninni var ekkert að standa mig vel.

Fékk mér síðan myndavélagöngutúr í Bónus í kvöld. Tók þá þessar myndir hér efst og neðst. Bíllinn hennar Ólafar á efri myndinni er við það að hverfa í snjóskaflinn. Það er spáð hálfgerðri stórhríð á morgun. Reyndar ekki mikil snjókoma en það verður hvasst með því. Í dag snjóaði meira í logni. Var samt dálítið blint. Fór með gönguskó í viðgerð vestur í bæ og var logandi hræddur um að einhver glanninn myndi keyra á mig. En það slapp til. Á neðri myndinni er eitthvað mér ókunnugt fólk að ganga yfir brúna á Miklubrautinni á móts við Hagkaup í Skeifunni - svona ef einhver fer að spá í þessar myndir. Ég annars nokkuð sáttur við þær.

En svo á ég að skila þessu greinaskrifaprófi á mánudag og svo andhverfa prófinu á föstudag. Veit ekki hvað kemur út úr þessum prófum hjá mér. Ef ég næ þeim þá ætla ég að láta það duga til að gleðja mig. Ef ég fell þá er það bara þannig. Ekki ætla ég að erfa það en hafa eitthvað meiri tíma til að gera það sem mér sýnist að þeim afloknum.

Veturinn ætlar ekki að gera það endasleppt

Ég verð víst að játa að það er rok!

Mér fannst hvasst í morgun en ekki svo rosalega samkvæmt honum Belgingi. Veðurstofunni tókst nú samt að mæla 30m/s hér rétt hjá mér. Ragnhildurinn í sjokki yfir að hafa ekki upplifað annað eins rok síðan í rokinu ógurlega 1991 þegar trén í Urðarstekknum fuku hvert um annað þvert. Hún víst að horfa á trén sín fjúka.

 

En þó það hafi verið hvasst við Bústaðaveginn þá er það ekki neitt miðað við það sem er á flugvellinum sem telst vera í miðbæ höfuðborgarinnar.  


Og ef einhver hélt að þetta hefði verið hvasst þá ætti sá hinn sami að fara upp á Skarðsheiði þar sem næst mesta vindhviða íslenskra veðurmælinga mældist í morgun!



En veðurvitinn á Skálafelli er fjarri góði gamni. Annað hvort er hann fokinn veg allrar veraldar eða kannski frekar bara sambandslaus. Útvarpssendirinn þar ku vera dottinn út líka. Verður spennandi að sjá hvort eða hvað hann sýnir ef hann nær að senda einhver gögn!



En þetta með að gera það ekki endasleppt er að ég vil meina að þetta sé upphafið að endinum á vetrinum. Með þessum lægðum núna helst hitinn yfir frostmarki og öflug rigning herjar á snjóinn líka. Það verður snjólaust í henni Reykjavík sýnist mér sem gætu komið sér vel eftir miðvikudaginn þegar ég vonast til að losna við gifsið. Það væri jafnvel hægt að komast út að hjóla einhvern tímann. Það yrði hreinn og beinn unaður!

Reykjavík með minnkandi vindverki

Í fyrirlestri í Vatna- og loftslagsfræðum gær hjá Einari Sveinbjörnssyni teiknaði hann upp ótrúlegt graf af meðalvindhraða í Reykjavík síðustu áratugina og sýndi að meðalvindhraði í Reykjavík hefði minnkað umtalsvert. Ástæða minnkunarinnar voru bygginaframkvæmdir í henni Reykjavík. Til samanburðar þá talaði hann um Reykjavíkurflugvöll og Keflavíkurflugvöll og stakk upp á að skoða tölfræðileg gögn um þetta.

Ég svindlaði örlítið og tók ekki flugvellina, heldur Reykjavík og síðan Stykkishólm til samanburðar. Hvor það er alveg eins og flugvellirnir er reyndar ekki alveg ljóst en niðurstaðan er merkileg samt.

Rauða línan er meðaltalsvinur fyrir 5 ára meðaltalsvind í Reykjavík og sú bláa er fyrir Stykkishólm. Það er greinilegt að línan fellur verulega fyrir Reykjavík og mun meira en fyrir Stykkishólm. En það sem er kannski undarlegast í þessu samhengi er hvað línan fyrir síðustu 15 árin er lík fyrir Stykkishólm og Reykjavík en þá minnkar vindurinn verulega á báðum stöðum. Það sem sker Reykjavík helst úr er e.t.v. það hvað meðalvindurinn minnkar mikið á áttunda áratugnum í Reykjavík á sama tíma og hann er að aukast lítið eitt í Stykkishólmi.

Mismunandi veðurspár Veðurstofu Íslands

Nú er ég enginn sérfræðingur í veðurspám, hvorki í veðurspám Veðurstofu Íslands né öðrum en eitt vekur alltaf dálitla furðu mína. Þegar hvasst verður heima hjá mér þá fer ég gjarnan á vef Veðurstofunnar og skoða hversu hvasst þeir segi vera og yfirleitt kemur mér jafn mikið á óvart hversu lítinn þeir telja vindinn í henni Reykjavík vera.

Það kannski gengur á með roki yfir allt landið og fréttir af 30 metrum á sekúndu einhvers staðar fyrir austan. Sjálfum finnst mér vera hvasst heima hjá mér og vil vita hvort það slagi í þessa 30 metra. Sé ég þá kannski mér til mikillar furðu að Veðurstofan segir ekki vera nema e.t.v. einhverja 10 metra á sekúndu í Reykjavík. Verða þá þessir 30 metrar þarna fyrir austan einhvers staðar æði æfintýralegir í mínum huga.

Síðan ef ég skoða vef Veðurstofunnar betur þá eru þeir bæði með staðspár og veðurþáttaspár. Staðspánum ber í þessum tilfellum sæmilega saman við það sem þeir segja vera í metrum á sekúndum en veðurþáttaspáin passar þá oft engan veginn við annað hjá þeim en passar hins vegar dálítið betur við það sem mér finns sjálfum.

Núna er spáð miklu roki um allt land næsta sólarhringinn. Þá datt mér í hug að skoða hverju þeir spá. Mér sýnist einna mest rokið ætla að verða í fyrramálið undir morgun einhvern tíman. Og eins og mín reynsla er, þá ber þessum tveimur spátegundum þeirra engan vegin saman. Fyrir kol. 6:00 föstudag 7. janúar eru þetta sjálfvirku spárnar þeirra:

Staðspáin:


Veðurþáttaspáin:


Á Bústaðavegi spá þeir 8 m/s í staðspánni en sýnist það vera líklega 15 m/s. Á Kjalarnesinu er aðeins meiri vindur skv. staðspánni eða 12 m/s en veðurþáttaspáin er að spá heilum 25 m/s.

Það mætti reyna að útskýra þetta með því að staðspáin sé að spá fyrir svæði en ekki einn stað (ekki skil ég þá alveg af hverju sú spá heitir staðspá) en það stenst samt engan veginn því veðurþáttaspáin gerir hvergi ráð fyrir vindi undir 20 m/s í nágrenni Kjalarness nema kannski í skjóli einhvers staðar í Esjuhlíðum