Jólin að klárast og einkunnir komnar í hús!

Jæja, þá eru jólin að klárast og einkunnir komnar í hús. Ég líka búinn að standa vaktina sem sölustjóri í flugeldasölu HSSR vi Grjótháls þar sem Össur er og bensínstöð Skeljungs sem hét einu sinni Select við Vesturlandsveg.

Eftir barlómsfrærsluna sem var skrifuð í desember þegar ég var að krebera á því að skrifa grein um öskufall sem próf þá er niðurstaðan sú að sem betur fer náði ég báðum prófunum. Einkunnir hins vegar mjög afstæðar. Í báðm fögum fékk ég í hærra lagi miðað við hvað ég átti von á - ég hefði a.m.k. ekki gefið mér hærra en ég fékk. Svipuð tala í báðum fögum en merkilegt nokk að í öðru var ég hæstur en í hinu var ég lægstur. Fyrir fram hefði ég alveg getað giskað á þessa niðurstöðu - þ.e. áður en ég fór að leysa prófin - en þá hefði ég giskað á að ég hefði orðið lægstur í því sem ég varð hæstur í en með þeim hæstu þar sem ég varð lægstur. Svona getur þetta snúist í höndunum á manni.

En niðurstaðan samt í samræmi við það að í öðru prófinu þá drapst ég næstum úr óvæntu áhugaleysi en í hinu þá fór ég langt fram úr mínum björtustu vonum.

Dálítið búinn á því eftir prófatíðina!

Át götóttan ost en gataði vonandi ekki á prófinu

Dálítið búinn á því eftir prófatörn. Reyndar eftir barlóm pósts fyrir svona viku þá var ritgerðarprófið sem ég var að taka þá óttalegt klúður hjá mér frá upphafi til enda. Átti að skrifa 3000 orða review paper og var dálítið þannig að ég tók eitthvað héðan og þaðan til að klessa inn í það sem ég var að gera. Ekki sérlega góð vinnubrögð og veit ekki hvaða umsögn ég fæ eftir það - en sleppur vonandi fyrir horn. Var búinn að hafa einhverjar vikur til að vinna þetta en komst ekkert til þess fyrr en seinustu vikuna. Það varð svo til þess að ég gerði ekkert í seinna prófinu fyrr en frekar seint. Átti að hafa um 10 daga til að vinna það en gat ekki nýtt nema 3-4 daga. Það var hins vegar alvöru heavy próf sem tók allan hugann þann tíma. Kom sjálfum mér jú bara þægilega á óvart með að geta eitthvað í því, því það fag var í hálfgerðri klessu hjá mér. Niðurstaðan þá sú að ég á von á að fá bágt fyrir það sem ég hélt að ég hefði dálítið á hreinu en svo frekar skárra fyrir það sem ég hélt að ég væri úti á túni með.

Af jöklamælingum, sjúkraþjálfun og annarri sjálfspindingu

Gunninn mælir sporð Hagafellsjökuls Vestari

Það náðist ein jöklamæling áður en allt fór á kaf í snjó. Það var vestari Hafafellsjökull sem var mældur og er hop frá því 2013 eitthvað innan við 110 metrar. Sem er bara nokkuð í meðallagi. Dálítið fúlt að hafa ekki mælingu frá í fyrra og úr þvíu sem komið er þá fæst engin mæling fyrir eystri jökulinn þetta árið.

Vestari jökullinn var mældur 18. október og var í sömu ferð komið við á Hlöðuvöllum til að bora á einum stað. Það tókst ekki alveg sem skyldi þar sem tvennt gerðist með borinn. Fyrst þá slitnaði ræsisnúran og við ekki með áhöld til að gera neina tilraun til viðgerðar. Svo á einhvern dularfullan hátt festist borinn í vélinni. Er hann þar ennþá! Það náðust bara tveir kjarnar nothæfir þannig að þessi mælistaður er í tómu tjóni. Gerðum tilraun til að fara helgina á eftir

Snjór á leiðinni inn að Hagavatni hvar snúið var við

Aftur var reynt viku seinna. Þá var hins vegar kominn talsverður snjór og líklega ófært að Hlöðuvöllum fyrir Nissan Norðlending - fórum samt upp frá Geysi. Við náðum með þokkalegu móti að komast upp brekkurnar við Mosaskarð en þar var hins vegar kominn allt of mikill snjór. Vegurinn ekki vel greinanlegur og alveg ljóst að við myndum lenda í alls konar basli þar á leiðinni. Ekki hjálpaði það heldur mikið til að ég var kominn með einhvern skrambans bakverk.

Á Hagavatnsvegi sem við reyndum líka við, snerum við við við kannski komnir hálfa leið inn að Einifelli. Það var kominn talsverður snjór en svo sem ekki ófært. Eflaust hefðum við komist en mér fannst ólíklegt að það yrði hægt að gera neina jöklamælingu af viti. Bakið líka að hrella mig.

Það var því snúið við en ég fékk þá eftir á að hyggja afar slæmu hugmynd að fara í Fellsmörk. Slæmu því ég þurfi annars vegar að vera að læra þessa helgi líka en ekki síður að ég held að þetta ferðalag hafi ekki gert bakinu á mér neitt gott.

Úr Fellsmörkinni var svo sem ekki margt að frétta. Nýja húsið er þannig séð tilbúið en veðrið var ekki upp á sitt besta í Fellsmörk, bakið að hrella mig og ég að reyna að læra eitthvað af veikum mætti. Skoðuðum varnargarða og þeir voru lítið skemmdir nema líklega eitthvað eytt af stubbunum á garðinum sem ekið er eftir.

Bakið var verulega slæmt á bakaleiðinni sem varð frekar fúlt viku seinna því þá var snjórinn að mestu bráðnaður og komið sæmilegt veður líka. Bakið er annars þannig að það er eiginlega fyrst að jafna sig eitthvað núna síðustu dagana, tæpum mánuði seinna. Núna er hins vegar kominn helst til of mikill vetur - eins og sjá má t.d. í Heiðmörkinni líka!

Svo sem ekki neinn gríðarmill snjór í henni Heiðmörk en samt þegar svona er komið þá má gera ráð fyrir snjó í öllum fjöllum!

Varðandi sjúkraþjálfun þá fór ég líka til Gunnars sérstaks bakþjálfa. Ég gerði líklega þau slæmu mistök að segja honum bara slysasöguna mína - en ekki að hann þyrfti að laga á mér bakið þannig að ég kæmist á skíði og út að hjóla. Hann svona meira leiðbeindi mér hvernig ég ætti að komast hjá því að reyna á bakið með því að gera helst ekki neitt og haga öllum hreyfingum þannig að ég myndi ekki reyna á bakið. Borferðir á Hlöðufell voru ekki til neinnar sérstakrar umræðu. Upphafið hjá t.d. Árna ökklaþjálfa var aðeins annað þegar ég kom á hækjunum til hans, með röntgenmynd sem sýndi mölbrotinn fót með sögu um að hann væri ennþá að mestu ógróinn en ég vildi hins vegar sjálfur helst fá að vita hvenær ég gæti farið í svona einhverja alvöru fjallgöngu. Ég klikkaði víst alveg á að láta Gunnar vita um það hvernig lífi ég lifi - eða vil a.m.k. lifa.

Svo má kannski líka færa til bókar að ég á að vera að læra andhverfar varpanir sem ég skil eiginlega ekki neitt í og raunar skil stundum ekki af hverju ég er að þessum masókisma þarna í háskólanum! Ég hefði a.m.k. átt að sleppa þessum hræðilegu andhverfum - hef varla erindi sem erfiði þar!

Lét ekki sjá mig á árshátíð HSSR sem var í Hrauneyjum. Bæði lærdómsvesen en líka þetta bak dálítið líka.

Og meðan ég man. Ólöf á neðri hæðinni er víst búin að finna sér hund til að koma í staðinn fyrir Guttann. Vona að hann verð án gelteiginleikanna.

Já og svo loks - þá er hugurinn dálítið hjá frönsku þjóðinni eftir hryðjuverk síðasta föstudags.

Þegar það kom snjór þegar við héldum að það yrði ekki kominn snjór

Slóðinn ósýnilegi upp með Þórisvatni hvar jarðfræðingar sáu sitt óvænna
og snéru við svo búið við.

Þó það hefði átt að vera löngu kominn vetur þá lét snjórinn all verulega bíða eftir sér - og það ekki bara í Reykjavík heldur líka uppi á hálendi. Gummin hennar Laufeyjar hafði sagt mér að Tungnárnjökull væri bara klaki neðstu parhundruð metrana. Ljósmynd úr Jökulheimum staðfesti að þar var ekki eitt einasta snjókorn. Ég var farinn að hugsa hvort það væri kannski hægt að fara í jöklamælingu að Hagafellsjöklum eftir allt saman eða hvort ég gæti farið einhvern túr að Hlöðufelli. En það sem varð úr var að ég fór með Haraldi Gunnarssyni þar sem förinni var heitið að gígnum Brandi við Þórisvatn. Ætlaði hann að sækja sér þar basaltgler til að greina í sínu mastersverkfni í jarðfræði - glerinnlyksur vill hann skoða.

Þorvaldur leiðbeinandinn hans hafði eitthvað hummað of lengi yfir því að fara í þessa ferð með honum þannig að úr varð að bara ég fór með honum. Veðurspáin þessa helgina var reyndar dálítið rysjótt. En ég gat ekki annað séð en að það ætti að verða skaplegt veður megnið af laugardeginum. Reyndar einhver úrkoma um nóttina og á tíma sýndist mér að það yrði hugsanlega stórhríð. Það hefði nú átt að segja mér að einhverjar líkur væru á því að það yrði einhver snjór kominn á svæðið - enda varð það raunin.

Það var ekki of gott skyggni á leiðinni og óttuðumst við þoku - sem samt hefði ekkert gert útaf við leiðangurinn þar sem við vorum með staðsetningar á hreinu. En einhvers staðar á Skeiðum eða ofar sáum við til fjalla og það sem truflaði okkur dálítið var að þau virtust sum hver vera alveg skjannahvít. Fyrir ofan Búrfellsvirkjun var allt orðið hálfgrátt yfir að líta. Snjóblinda og ekki of gott að keyra. Svo óx snjórinn en minnkaði líka aftur og við urðum bjartsýnir. Á Veiðivatnavegi var samfelld snjóföl. Þar sem við komum að GPS punktinum sem átti að segja okkur hvar ætti að beygja slóðann upp með Þórisvatni var ljóst að þetta gengi ekki. Slóðinn var svo gott sem ósýnilegur og þá ljóst að örðugt yrði að finna heppilegt grjót til sýnatöku. Var því snúið við en ætlunin að renna þar uppeftir aftur við tækifæri næsta sumar!

------------------
Skráð ERS / 8.12.2014

Að klúðra fyrirlestri

Þetta var eiginlega dálítið meira en undarlegt. Ég á nú ekki að heita neinn algjör byrjandi í að flytja fyrirlestra eða segja frá einhverju en ég leit held ég út í dag eins og ég hefði aldrei staðið fyrir framan fólk að segja frá. Það má reyndar segja að ég hafi aldrei áður staðið svona einn fyrir framan eitthvað fólk að segja frá einhverju á ensku... en það var ég að gera núna.

Þetta var eignlega alveg grá-andskoti bölvað. Það er langt síðan ég var síðast búinn að undirbúa mig svona mikið, skrifaði meira að segja nótur inn í ppt skjalið og var alveg búinn að setja niður fyrir mér hvað ég ætlaði að segja. Svo stóð ég eins og auli þarna eða það fannst mér í öllu falli og gat eiginlega ekki sagt neitt af því sem ég hafði ætlað mér að segja frá. Gleymdi öllu og held að ég hafi virkað eiginlega algjörlega eins og auli. Eiginlega það eina sem ég gerði svona næstum því skammlaust var að lesa glærurnar.

Fyrirlesturinn er annars hér. Það var einnig búinn til vefur um þetta og minn hluti er hér.

Jarðfræðikortagerð

Ívar að kenna að logga!

Ætlaði að skrifa eitthvað en ekki mikill tími til neins. Það var verið í jarðfræðikortagerðarfelti meira og minna frá 10 ágúst til byrjun september. Var að verða dálítið þreyttur á því þegar fletvinnunni þar loksins lauk. Og þá var haldið út á Snæfellsnes í jarðeðlisfræðifelt!

Ætli það þurfi ekki að blogga eitthvað aðeins

Báðum verða prófin búin / the exams will soon be over!

Já hvernig gengur? Það gengur! cava? cava! cava tres bien... eða var það ekki einhvern veginn þannig. Er annars ekki búinn að vera að tala mikla frönsku en búinn að vera dálítið enskuskotinn síðustu vikuna. Og held ég sé bara ekkert svo slakur þar! Búinn fyrir svona einni og hálfri viku að taka próf í Almennri jarðeðlisfræði og það gekk bara svona ágætlega. Einkunn fyrir skýrsluna og dæmatímana út úr korti og kannski næ ég einhverri einkunn sem ég hef aldrei náð áður. Er nú samt ekki of viss um allt sem ég gerði á prófinu en held samt að ég hafi nú kunnað þetta ágætlega. Mér finnst reyndar líka að ég kunni ágætlega rof og setmyundun jöklanna en þar tókst mér að fá 5 í einkunn á einhverju krossaprófi. Verð að játa að krossapróf þeirrra félaganna eru frekar undarleg og efast um að þau hafi verið að mæla þekkingu á réttan hátt eða þannig að 5 í einkunn þýði að maður kunni bara helminginn af því sem gert er ráð fyrir að maður kunni. Var í ferð að Fláajökli um síðustu helgina og þurfti þar að brúka þessa 50% þekkingu mína. Held að hún hafiu nú virkað alveg sæmilega meira en 50% þar. En myndin að neðan er úr ferðinni. Alveg edilonsfín ferð þó veðrið hafi verið hreinn hryllingur!

Well, how is it going? It is going! Cava? cava!... cava tres bien! Or wasn’t it said somehow like that when I tried to learn how to speak French almost 30 years ago. But recently I have not been speaking so much in French but more in English. And I think I’m not as bad in English as I thought. At least could the English boy not correct so much in my writing in the field report I’m working on.

Hópur 8 á stöð 8 sem var bara snilld. Það fannst að minnsta kosti mér og ég held stelpunum þremur en honum James fannst ekki alveg jafn gaman!

Ferðin var já svona fyrir utan veðrið bara algjör snilld - eða það fannst mér að minnsta kosti. Kannski fúlast að ég kynntist skemmtilegu fólki... kannski aðallega einu fólki sem hefði verið meira gaman að kynnast fyrr í námskeiðinu. fólk svona sem síðan fer bara til útlanda heim til sín og maður sér kannski bara aldrei aftur.

ENSKA

....

ÍSLENSKA

ENSKA

ÍSLENSKA

ENSKA

ÍSLENSKA

ENSKA

Snæfellsnes með jarðfræðinemum

......

....

Og þá hefst biðin eftir einkunnunum

Prófin mín búin þetta misserið. Þarf að ákveða hvaða fög og hvað mörg verða tekin eftir áramótin. Úttektavinna á morgun og svo eitthvað meira í næstu viku. Þarf líklegast að gera einhvern skurk í vinnumálum ef ég ætla ekki að verða gjaldþrota!

Prófið gekk annars bara svona og svona. Spurningarnar frá uppáhaldskennaranum voru frekar snúnar sumar og eiginlega dálítið fúlt að ég skildi ekki allt sem átti að gera. Eitthvað skrambans jarðfræðikort sem ég botnaði ekkert í þannig að ég varð bara að skálda eitthvað. Hinn kennarinn sem er ekki alltaf jafn mikið uppáhalds var hins vegar bara með fínt próf. Ég get annars kvartað undan hvorugum. Það þýðir víst ekki mikið að kvarta yfir því sem maður skilur ekki. Maður á bara að skilja hlutina.

Verst að það var ekkert spurt um bergormana sem ég kalla alltaf gorma ;-)

En afslappelsi í kvöld, vinna á morgun og hinn og svo vonandi Fellsmörk um helgina.

Suðurladsferð að baki

Jarð- og landfræðinemar við jökulker af stærri gerðinni fyrir framan Gígjökul

Þá hefur maður farið í jarðfræðiferð með öðrum nemöndum. Það var í mestan part bara gaman en samt eru sumir dálítið eins og úti á þekju. Kannski birtist best í því að vera einsamall í herbergi og geta ekki taggað neinn á myndunum sem fóru áðan á fésbókina... ja reyndar fyrir utan Rakel og Hönnu Lilju á einni mynd sem er auðvitað ekki svo lítið. Annars mikið betrara að skoða myndirnar á Flickr þar sem verður til sett af myndunum í eitthvað skárri upplausn.

Ég man síðan ekkert úr ferðinni sem slíkri þar sem dagbókinni úr sem lýsti öllu... nákvæmlega öllu sem fyrir augu bar... var skilað til yfiferðar í lok ferðarinnar!

Spekúlerað í öskulögum við Hólmsárbrú

Í lok ferðar var farið upp á Kögunarhól við Ingólfsfjall hvar ótrúlega góð skýjamyndum blasti við. Kannski spurning um að gefa nafna mínum Sveinbjörnssyni þessa mynd til að nota í skýjamyndakennslu einhvern tíman. Hægt að smella á myndina til að fá hana súper stóra!

Skýjamyndir suðurlands ofan af Kögunarhóli við Ingólfsfjall. Hægt að smella á myndina til að fá hana stóra - stóra

Veðrið var mjög sérstakt. Skúraveður með frekar köldum skúrum og þegar við vorum á Selfossi kom á okkur slydda eða mjög blaut snjókoma. Jörðin var heit þannig að snjórinn bráðnaði um leið og hann lenti. Svo stytti upp og sólin braust fram. Uppgufunin var svo mikil þarna í Kögunarhól að það rauk úr honum. Skýjabólstrar hrönnuðust upp og þessi mynd var tekin til austurs-suðurs-vesturs.

Myndir úr ferðinni eru á Flickr.

---

Svo þegar ég komst í netsamband heima hjá mér þá komst ég að því að einkunnagjöf í SMS virkar ekki baun í bala. Þrjár einkunnir komnar og jújú... er núna kominn með jafnmargar níur og í verkfræðináminu hér í dentíð. Ekkert rosalega slæmt það og jarðfræði2 einkunnin ætti að koma á morgun.

Kaflaskipti

Tók seinasta prófið núna í morgun. Þau voru nú reyndar ekki mörg prófin. Kúrsarnir voru fjórir. Í einum voru vikuleg próf og ein ritgerð en ekkert lokapróf, í einum voru verkefni og síðan þriggja daga heimapróf sem gilti ekki nema einhver 25%, svo stóra jarðfræðiprófið fyrir viku síðan sem gekk eiginlega frá mér en ég held að ég hjafi gert bara þokkalega hluti á og svo í morgun loftslagshlutinnn í Vatna- og loftfslagsfræði.

Dálítið undarlegt próf eða svona hvernig staðið var að því. Það var einhver hyper rúmlega miðaldra kona sem stjórnaði öllu í stofunni sem prófið var. Hélt langa fyrirlestra og vísaði til fyrri reynslu sinnar. Hélt áfram eftir að prófið var löngu byrjað að trufla með einhverjum fáránlegum tilkynningum. En það skondna var að prófið sem átti að vera 1,5 klst var bara gert að þriggja tíma prófi eða það sýndist mér. Ég gerði ráð fyrir einum og hálfum og var eiginlega búinn þegar sá tími var liðinn og skilaði bara en flestir sátu áfram. Varð til þess að ég missti af því að fara á kaffihús eða eitthvað með henni Björgu. En það hlýtur að gefast annað tækifæri til þess. Hef ekki kynnst mörgum þarna í HÍ í vetur og eiginlega helst henni Björgu sem var með mér í hópverkefni í vatnafræðinni.

Svo eftir hádegið þá breyttist ég úr skólastrák í stjórnunarráðgjafa og kennara. Var að kenna á úttektanámskeiði eftir hádegið með Kjartani í Vottun. Fastir liðir eins og venjulega. Námskeiðið orðið 17 ára gamalt. Ekki slæm ending það á svona námskeiði.

Komst svo loksins í langþráðan hjólatúr. Varð reyndar ekkert of langur þar sem ég ætlaði að halda upp á próflokin með að sötra smávegis rauðvín með steiktum lambaskanka. Rann ljúft niður.

Já svo annars. Er svona að ganga frá því að verða skálvörður hjá FÍ í Landmannalaugum í júlí í sumar. Verður vonandi bara gaman að prófa það!

Já og svo er stefnt á Fellsmörk um helgina en reyndar ekkert sérstaklega hagstæð veðurspá og svo á líka að fara í jeppakaupaleiðangur. Það verður að bíla sig eitthvað upp held ég fyrir sumarið.

Á röndóttum sokkum á röngunni

Háskæld lokapróf eru sko ekkert til að gera grín að

Reyndar ekki lengur á röngunni en jafn röndóttir eftir sem áður

Það er alveg með ólíkindum hvað maður getur stressast fyrir svona próf. Jafnvel þó einkunnin skipti varla nokkru máli - nema þá kannski fyrir sjálfan mann - en það er þá kannski einmitt þess vegna sem það verður svona mikilvægt að standa sig vel. Held líka að Hreggviður hefði orðið alveg miður sín ef ég hefði klúðrað prófinu eitthvað illilega, sem gerðist held ég ekki enda ekki miklar líkur til.

Mér gekk annars ágætlega þó svo ég hafi nú ekki alveg vitað allt. Hver kann að nefna til dæmis nöfn á einverjum námum erlendis? Og til hvers? Var ágætur því því þarna sem máli skipti og bara þokkalega sáttur við mig sjálfan í þessu.

Síðan margt fyndið hvernig hlutirnir eru í undarlegri röð. Hitti þarna fyrir utan prófstofuna hana Hönnu Þóru sem ég réði til að vinna með mér í Stjórnvísi hér í dentíð. Þarf svo núna að klára að fara yfir og gefa einkunnir í gæðastjórnunarnáminu í Endumenntun þar sem einn nemandinn er mamma eins nemandans sem tók próf með mér í morgun. Þetta er stundum allt einhvern veginn á haus!

Síðan mætti ég í prófið, eins og við mátti búast á röndóttum sokkum en svona til hátíðarbrigða (reyndar alveg óvart) hafði ég annan sokkinn á röngunni. Vonast ég til að það sé gæfumerki og verði talið mér til tekna.

Núna þegar ég klára einkunnagjöfina hjá Endurmenntun (hvar skiladagur einkunna er víst í dag - hvað ég myndi ekki þola sjálfan mig sem kennara) þá taka við veðurfræðileg verkefni og loks próf í þeim fræðum eftir viku. Svo kennsla á úttektarnámskeiði og einhver gæðaleg vinna. Það er víst eitthvað í að jarðfræði verði í askana látin - hvað sem verður einhvern tíman. Gefum öllu sinn tíma.

Í gærkvöldi var svo aðalfundur Fellsmerkur þar sem Kjartan að sér og mér fjarstöddum var kosinn formaður.

Reykjavík með minnkandi vindverki

Í fyrirlestri í Vatna- og loftslagsfræðum gær hjá Einari Sveinbjörnssyni teiknaði hann upp ótrúlegt graf af meðalvindhraða í Reykjavík síðustu áratugina og sýndi að meðalvindhraði í Reykjavík hefði minnkað umtalsvert. Ástæða minnkunarinnar voru bygginaframkvæmdir í henni Reykjavík. Til samanburðar þá talaði hann um Reykjavíkurflugvöll og Keflavíkurflugvöll og stakk upp á að skoða tölfræðileg gögn um þetta.

Ég svindlaði örlítið og tók ekki flugvellina, heldur Reykjavík og síðan Stykkishólm til samanburðar. Hvor það er alveg eins og flugvellirnir er reyndar ekki alveg ljóst en niðurstaðan er merkileg samt.

Rauða línan er meðaltalsvinur fyrir 5 ára meðaltalsvind í Reykjavík og sú bláa er fyrir Stykkishólm. Það er greinilegt að línan fellur verulega fyrir Reykjavík og mun meira en fyrir Stykkishólm. En það sem er kannski undarlegast í þessu samhengi er hvað línan fyrir síðustu 15 árin er lík fyrir Stykkishólm og Reykjavík en þá minnkar vindurinn verulega á báðum stöðum. Það sem sker Reykjavík helst úr er e.t.v. það hvað meðalvindurinn minnkar mikið á áttunda áratugnum í Reykjavík á sama tíma og hann er að aukast lítið eitt í Stykkishólmi.