Tollaklikkun Trumps...

Ég skil ekki alveg hvernig þetta á að virka en ég sé ekki annað en Trump sé að klippa Bandaríkin út úr viðskiptum við önnur ríki. Fyrr í vetur var ég aðeins að endurnýja myndavélabúnað og það var hagkvæmast fyrir mig að kaupa beint frá USA úr stórum myndavélabúðum í New York sem er mjög þægilegt að kaupa af í gegnum netið. Þegar ég lagði inn pöntunina þá hafði ég mestar áhyggjur af því að Ísland myndi fara að setja mótvægistolla á það sem er keypt inn frá USA og það hefði þá hækkað það sem var að kaupa um 10-20%. Það varð ekkert af því þá þó það gæti gerst. Það sem ég hins vegar sé er að myndavéladótið sem ég keypti og hef keypt beint frá USA í gegnum árin er allt framleitt í Tælandi, Taiwan og Japan. Þar eru núna komnir eitthvað um 35% tollar á innfluttar vörur til USA.

Ég get ekki séð annað en að verði til þess að vöruverðið í USA hækki um eitthvað þannig hlutfall því ekki geri ég ráð fyrir að framleiðendur í Asíu geti bara lækkað sitt verð um þriðjung. Svo gæti bæst við tollur sem Ísland myndi setja á innflutning frá USA.

Svona nokkurn veginn virkar þetta þannig á mig að það kaupir enginn neitt frá USA ótilneyddur nema það sem þeir þá framleiða sjálfir sem er yfirleitt ekki nein sérstök eftirspurn eftir. Áhugi á því að flytja einhverjar vörur til USA hlýtur einnig að minnka mikið. Þeir eru því að klippa sjálfa sig út úr milliríkjaviðskiptum. Kannski er ég eitthvað að misskilja hvernig þetta kemur til með að virka en það sem ég sé í þessu er alveg út í hött og reyndar lang verst fyrir fólkið sem býr í Bandaríkjunum. Fólk í öðrum löndum getur bara fært sín viðskipti eitthvað annað.

Það sem ég reyndar helst vona er að þetta sé í heildina bara eitthvað rugl sem verði aldrei að neinum veruleika. Það sem segir mér m.a. að það sé þannig eru t.d. þessir tveir dálkar sem eru þarna á þessari mynd. Þar kemur fram að EU sé með 39% toll á innflutning frá USA. Ég einhvern veginn geri ráð fyrir að það sé rugl því Ísland ætti að vera með eitthvað svipað og EU en ég veit miðað við það sem ég kaupi sjálfur af USA að þar er enginn tollur settur á almennan innflutning. Trump er hugsanlega að rugla saman sköttum og tollum en skattarnir koma því ekkert við hvort varan sé innflutt eða ekki, skatturinn greiðist af öllum vörum.

Á að setja girðingu við Bröttufönn?

Vegna fréttar mbl.is

Í Bröttufönn - hinni ógurlegu undarlegu snjóbrekku sumarið 2008

Stórhættulega snóbrekkan í frett mbl.is er líklega Brattafönn sem ég hef gengið niður svona 15 sinnum og á hverju ári ganga mörgþúsund manns um þá sömu brekku. Ég hef aldrei heyrt um slys í þeirri brekku. Í Jónsmessugöngu Útivistar árlega ganga mörghundruð manns um þessa sömu brekku að næturlagi.

Mér finnst frekar undarlegt og lélegt að forkólfur björgunarsveitar sjái ekkert nema vesesn við það að fólk hafi áhuga á að skoða náttúruna. Og að það eigi jafnvel að banna útivist af því að fólki verði of kalt á höndunum.

Núna er aska í brekkunni og hún því mun minna hál en venjulega segja þeir sem hafa fengið "leyfi" Almannavarna til að fara inn í Þórsmörk.

Eina fáviskan sem ég hef séð þarna og ætti kannski að banna er það athæfi Hótel Holts að setja upp snobbeldhús uppi á Fimmvörðuhálsi og bjóða þar upp á hraungrillaðan humar. Sá eini sem hefur látið lífið af völdum hrauns á Íslandi stóð of nærri slíkum hraunjaðri og fékk hraunmola í hausinn.

Hólmsárlón

Í Hólmsárbotnun sumarið 2007

Óláni Íslendinga verður allt að vopni. Núna eru einhverjir sem vilja fara að eyðileggja Hólmsárbotna. Orðið Hólmsárbotnar kveikir líklega ekki viðvörunarbjöllum hjá mjög mörgum. Rauðabotn þekkja ekki margir en einhverjir hafa jú heyrt um Strútslaug. Þar er heitt vatn en núna rann mér kalt vatn milli skinns og hörunds.

Það var líklega sumarið 1995 sem ég heyrði fyrst talað um einhvern undrastað sem hét Strútslaug og þangað langaði mig strax til að komast. Það gerðist þó ekki alveg strax. Reyndar komst ég langleiðina þangað á gönguskíðum um páska 1998 en það var ekki fyrr en sumarið 2000 sem ég kom þangað fyrst. Gekk þá af Laugaveginum yfir jaðar Torfajökuls og ofaní Hólmsárbotna þar sem Strútslaug er.

Sumarið eftir fór ég aftur og kom þá úr hinni áttinni með hóp af fólki með mér. Gengum þá upp á Torfajökul þrír saman í brjáluðu veðri og fórum í Hrafntinnusker. Það var gaman.

Besta ferðin var samt kannski þegar ég og HK fórum gangandi úr Landmannalaugum í Hattver, upp úr því og yfir Torfajökul miðjan og ofan í Strútslaug í Hólmsárbotnum. Gengum síðan daginn eftir yfir Hólmsárbotnana í sandölunum og meðfram náttúrulegu lóninu sem Hólmsá kemur úr. Áttum þarna dag í okkar æfintýraveröld.

Það voru settir upp sandalar og arkað beint áfram yfir það sem fyrir varð.

Það er nefnilega þannig þó það minnist ekki margir á það að plamp um hinn svo kallaða Laugaveg er alls ekki í ósnortinni náttúru lengur. Þar eru ferðamenn svo margir að maður fær ekki fyllilega á tilfinninguna að maður sé annað en einn af túristunum. Vilji maður breyta því hefur verið þjóðráð að arka austur fyrir Torfajökul og koma þar í ónumið land Hólmsárbotna en kannski ekki mikið lengur.

Rarik og kannski Landsvirkjun ætla að fá rannsóknarleyfi til að fara að setja lón sem nær meira og minna yfir allt svæðið og eyðileggur það nær algjörlega. Verri virkjunaráform hef ég líklega aldrei heyrt. Þetta slær við hugmyndinni um Bjallalónið sem var talað um í vor og er á vissan hátt verra en Hálslón við Kárahnjúka.

Kort sem sýnir hluta gönguleiðarinnar og hvernig lónið kæmi til með að dreifa úr sér

HK öslar áfram yfir vatnasvæðið í Hólmsárbotnum. Þetta færi allt á bólakaf í hinu fyrirhugaða lóni

Panorama mynd sem sýnir flatlendið sem færi á kaf. Hægt aqð smella á myndina til að fá hana stóra. Afsakið reyndar að það er einhver samlímingargalli í henni

Fossarnir þar sem vatnið gusast núna fram úr núverandi náttúrulegu lóni sem þarna er hverfa væntanlega.

Efsti foss Hólmsár þar sem áin rennur út úr lóninu

Og annar foss þar fyrir neðan

En einhver kynni að benda á að það sé bara verið að tala um rannsóknarleyfi en ekki neitt framkvæmdaleyfi og það geti varla verið slæmt að rannsaka svæði.

Þá er það þó því miður þannig að með rannsóknarleyfi þarf yfirleitt að leggja í alls kyns framkvæmdir til að geta stundað rannsóknirnar. Það þarf oftast veg og það þarf að bora til að vita hvernig undirlagið fyrir stífluna á að vera. Frægar eru auðvitað rannsóknarborholur sem eru gerðar eins og vinnsluborholur þegar verið er að virkja jarðhita. Síðan man ég vel eftir framkvæmdunum á Kárahnjúkasvæðinu sem voru gerðar á meðan eingöngu r var rannsóknaleyfi til staðar.

Síðan man ég varla eftir því að gefið hafi verið út rannsóknarleyfi án þess að virkjanaleyfi hafi fylgt í kjölfarið. Enda leggja virkjanaaðilar yfirleitt út í svo mikinn kostnað við rannsóknirnar að það er ekki forsvaranlegt annað en að leyfa þeim að halda áfram.

......

....

Lýðveldið Ísland

Hann heitir Jón og átt afmæli sama dag og Ísland

Tilraunin hófst 17 júní 1944 (eða kannski hófst hún 874 ég veit það ekki alveg) og henni lauk í október 2008. Mjög merkileg hagfræðitilraun sem fólst í að athuga hvort dvergþjóð gæti staðið á eigin fótum. Tilraunin gekk brösótt á köflum en þjóðin virtist endanlega vera að taka flugið í byrjun 21. aldarinnar. Þá gerðist það undarlega að þjóðin var eins og flugvél sem ofreisir sig og missir svo flugið og steypist til jarðar með braki og brestum.

Allt í einu fóru allir landsmenn að haga sér eins og nýfjárráða unglingar og eyddu öllu um efni fram og því fór sem fór.

Í flestum hagfræðibókum 21. aldarinnar er kafli um íslenska æfintýrið. Dæmi um víti til að varast.

Það eru annars mörg ár síðan ég bloggaði svona mikið síðast og líklegast er þetta meira af vilja en getu sem ég er að tjá mig hér og nú!

Að fara á hausinn

gamla daga voru síldarspekúlantar út um landið sem urðu ógeðslega ríkir og svo fór síldin og þá urðu þeir ógeðslega blankir eða fóru bara á hausinn. Þetta var í sjálfu sér bara gangur lífsins. Af hverju mega síldarspekúlantar nútímans ekki líka bara fara á hausinn?

Og af hverju er þetta svona. Í fyrra voru allir ógeðslega ríkir og ekkert lát á ríkidæmi landans. Það voru peningar alls staðar sem maður skildi ekki alltaf alveg hvaðan komu. Við áttum held ég áralangt heimsmet í viðskiptahalla en vorum samt einhver ríkasta þjóð í heimi. Einhvers staðar frá kom endalaust magn af peningum og hvaðan? Jú, líklega kom það frá útlöndum.

Það voru einhverjir íslenskir nútíma síldarspekúlantar sem áttu einhver fyrirtæki sem möluðu gull og þeir áttu banka sem möluðu gull sem kom líklegast þá erlendis frá í formi lánsfjár frá einhverjum erlendum síldarspekúlöntum og allir þessir græddu að öllum líkindum alveg ógeðslega mikið… en ekki lengur.

Núna kemur enginn peningur að utan sem til dæmis birtist í því að það vilja fæstir kaupa íslenskar krónur fyrir einhvern erlendan gjaldmiðil. Það sem var kallað hard currency hér í dentíð. Og þá stoppar þessi undarlega íslenska peningahringekja. Og hvað gerist? Fara þá ekki bara síldarspekúlantarnir á hausinn?

Bankarnir og fyrirtækin sem voru með alla peningana vörðu þeim líklegast ekkert of skynsamlega. Allt of há laun og allt of háar aukasporslur fyrir hagnað sem líklega var ekki neinn alvöruhagnaður og allt of mikið af fjárfestingum sem voru rugl út í buskann og skiluðu engum hagnaði þó reyndar eflaust sumt hafi tekist ágætlega.

En af hverju mega síldarspekúlantar nútímans ekki bara fara á hausinn eins og var hér áður fyrr. Fyrirtæki sem kunna ekki fótum sínum forráð eiga bara að fara á hausinn. Bankar sem lána þeim endalaust ættu líka að fara á hausinn og er þetta eitthvað svo hroðalegt.

Sjálfur vinn ég hjá einu ágætu fyrirtæki sem er í eigu annars fyrirtækis sem er í eigu annars fyrirtækis sem heitir Stoðir eftir því sem ég best veit og þeir eru á hausnum. Þeir skulda einhverjum, líklega bönkum fullt af peningum sem þeir geta ekki borgað og þá væntanlega þá eignast bankinn bara fyrirtækið. Bankinn fær samt auðvitað ekki allt til baka. Bankinn tók áhættu og lánaði í einhvern áhættu rekstur og verður að sitja uppi með það. Bankinn (sem er íslenskur) getur þá ekki staðið í skilum því hann fékk peningana sem hann lánaði að láni hjá öðrum banka (sem er útlenskur). Útlenski bankinn eignast þá bara íslenska bankann og vonandi er sá banki það stöndugur að fara ekki á hausinn líka. Þá eru bankinn íslenski bara orðinn útlenskur banki og er það ekki allt í lagi ef hann verður með einhverja starfsemi hérlendis? Þá á erlendi bankinn í raun fyrirtækið sem ég vinn hjá og væntanlega til að erlendi bankinn fái eitthvað fyrir sinn snúð þá fær það bara að starfa áfram eins áður hver svo sem hefur átt það í gegnum tíðina (sem eru orðnir dálítið margir aðilar).

Kannski eina vandamálið er að fólkið sem átti peninga í bönkunum tapar þá hugsanlega sínu sparifé en ekki ef stjórnvöld axla sína ábyrgð vegna slíkra skuldbindinga bankans.

En … æji … þetta er orðið langt og leiðinlegt og kannski ætti maður bara að fara að sofa og sjá hvort það verði ekki bara einhver allt annar veruleiki þegar maður vaknar á morgun.



Annars þetta með að hafa fengið allar þessar aukasporslur, stjórnendur almenningshlutafélaga, fyrir milljarðahagnað sem líklega var aldrei raunverulegur hagnaður… erlendis hefur fólk hefur farið í fangelsi fyrir minna held ég. Og ef það fylgir með í kaupunum að heil þjóð verði gjaldþrota þá er þetta eitthvað sem kalla mætti landráðastarfsemi.

Þeir eru stórtækir síldarspekúlantar nútímans.

Er það ekki annars dálítið skondið að allir 300 þúsund íslendingarnir (og ég þar meðtalinn að sjálfsögðu) hafa núna á einni viku breyst í útlærða hagfræðinga sem vita allt betur en allir aðrir!

Á kannski bara að loka sjoppunni og fara til Kanarí

Ég veit ekki alveg hvar ég á að byrja... mér hefur flogið svo margt í hug þessa síðustu daga. Ein setning hefur oft komið upp í hugann sem ástsæli seðlabankastjórinn þáverandi forsætisráðherrann sagði einhvern tíman að ef eitthvað væri gert eða ekki getrt sem var honum mjög á móti skapi að þá gætum við allt eins lokað sjopunni og farið til Kanarí.

Það er svo margt sem maður hefur heyrt sem vekur mann til umhugsunar. Hvers konar vit er í því að hafa gamla pólitíkusa að stjórna seðlabanka einnar þjóðar. Sama manninn og ef ég man rétt lagði niður ráðgjafastofuna sína, Þjóðhagsstofnun af því að hún sagði eitthvað sem honum mislíkaði. Annars var áðan í fréttum að einhver Ingimundur seðlabankastjóri hafi verið á fundi með ríkisstjórninni. Ég man ekki eftir ráðherra og ekki einu sinni þingmanni sem heitir Ingimundur þannig að það er kannski einhver í seðlabankanum kominn fram sem eitthvað veit og getur.

Og svo á að fara að nota lífeyrissparnaðinn minn til að bjarga þessu öllu saman. Ég ætla rétt að vona að það séu sett almennileg skilyrði áður en það verður fara að gambla kannski einu sæmilega öruggu eignina manns af því að verðum jú öll að sýna ábyrgð. Sýna ábyrgð gagnvart hverju? Gagnvart þjóð sem er á hausnum... já kannski. En ábyrgð til að bjarga bönkum... nei ég held varla eða eiginlega alls ekki.

Hvað felst í að sýna ábyrgð?

Fyrir ári síðan og meria að segja fyrir nokkrum mánuðum síðan voru bankarnir allir að sýna fínar afkomutölur og alveg ótrúlega fínar afkomutölur ef ég man rétt. Kreppan virtist þá bara vera eitthvað í fjölmiðlunum en þessir ofursnjöllu stjórnendur bankanna með milljón plús (alveg helling) í laun á mánuðu héldu áfram að standa sig.

Snillingarnir sem ráku sín fyrirtæki með margmilljarða hagnaði ár eftir ár. Fengu líka lágmark tugmilljóna bónusa fyrir að standa sig svona frábærlega. Ef þessi margmilljarða hagnaður var raunverulegur, hvernig getur það þá allt í einu gerst að bankarnir geta ekki staðið við skuldbindingar sínar. Ég hélt að banki væri að mestu leyti eins og hvert annað fyrirtæki ef vel gengi þá væri til aur til að standa við það standa ætti við.

Ef ég á að sýna ábyrgð með að lána þessum snillingum lífeyrissparnaðinn minn þá held ég að það sé lágmark að snillingarnir skili aftur bónusunum sem þeir fengu fyrir að setja bankana á hausinn!

Hvar er annars forsetinn núna að stappa stálinu í þjóðina - ætti hann ekki að reyna að hugga hina skefldu þjóð.

Úrskurður er fallinn

Ég er umhverfiskommi!

Tók Bifrastarprófið...

Stuðningur við Sjálfstæðisflokk: 12.5%
Stuðningur við Framsóknarflokk: 10%
Stuðningur við Samfylkinguna: 12.5%
Stuðningur við Vinstri-Græna: 37.5%
Stuðningur við Frjálslynda flokkinn: 9%
Stuðningur við Íslandshreyfinguna: 30%

Það er spurning hvort mar hafi kjóst rétt!

Annars var ég að sjá að þetta er nú bara hálfgert miðjumoð hjá mér. Enginn sem nær yfir 50% hmmmpf... Kannski þarna komin ástæða fyrir að mér gekk ekkert of vel að ákveða mig fyrir þessar kosningar!

Svo prófaði ég að fikta í þessu og þykjast vera eitthvað. Dálítið skondið hvernig flokkarnir eru mismunandi en samt líkir. Einfalt að gera sér upp skoðanir flokkanna lengst úti á kantinum. Lítið mál fyrir mig að segjast vilja eitthvað sem varð rúmlega 90% sjálfstæðisflokkur og svo eitthvað rétt tæplega 90% Vinstri grænn. Hinir flokkarnir erfiðari. Skrýtnast að mér þegar mér tókst að sulla saman skoðun sem 70% Framsóknarmaður þá var ég meiri Vinstri grænn en ég var þegar ég gerði svona eins og mér finnst sjálfum og skoraði jafn mikið sem Sjálfstæðismaður. Pólitík a la Bircfröst er greinilega of flókin fyrir mig!

Sigurvegari kosninganna er...

En svo er alltaf skemmtilegt að skoða hver sigrar í kosningum eða hver sigrar ekki!

Vinstri grænir með alla sína fylgisaukningu eru auðvitað sigurvegarar kosninganna þrátt fyrir að ná ekki megin markmiði sínu að fella ríkisstjórnina!

Sjálfstæðisflokkurinn er auðvitað sigurvegari kosninganna. Langs stærsti flokkurinn og bætti við sig þremur þingmönnum þrátt fyrir að ríkisstjórnarmeirihlutinn þeirra sé svo tæpur að hann er varla almennilega starfhæfur!

Samfylkingin er auðvitað sigurverari kosninganna því flokkurinn tvöfaldaði fylgið sitt frá einhverjum skpoðanakönnunum sem voru gerðar fyrir mánuði síðan. En svo auðvitað var samfylkingin að tapa þingmönnum þannig að hmmmm...

Íslandshreyfingin er auðvitað sigurverari kosninganna með fleiri atkvæði en nokkurn tíman og bara óréttlátri kosningalögggjöf að kenna að hafa ekki fengið þingmann!

Og svo framsókn... æji... það er hvernig hægt er að vinna kosningar... júts, ríkisstjórnin þeirra hélt velli!

En sá sem er endanlegur sigurvegari kosninganna er auðvitað Fréttablaðið. Hvað er það annað en snilld að gefa út tvö blaðið tvisvar sama daginn með sitt hvorri forsíðufréttinni: "Ríkisstjórnin fallin eftir afhroð framsóknarflokksins" eða "Ríkisstjórnin hélt og féll til skiptis í nótt". Hvað er það annað en snilld að prenta dagblað með þessari fyrirsögn um fall ríkisstjórnarinnar rétt upp úr miðnætti þegar búið er að telja einhvern fjórðung atkvæða! Eru þetta börn nýbyrjuð í blaðamennsku?

....

Hjólastígar Reykjavíkur - ég elska þig!

Nei ekkert svoleiðis en mér datt í hug að athuga aðeins hvað væri í boði af hjólastígum og fann út að Reykhavíkurborg hefur ákveðið að einfalda sér lífið aðeins. Í staðinn fyrir að gera almennilega hjólastíga eins og ætti að gera hafa þeir snillingar látið sér nægja að gera rosalega flott kort með gulum aðalleiðum og grænum aukaleiðum!

Í gær man ég t.d. eftir að hafa hjólað Ármúlann. Bílar leggja þar fyrir og uppi á gangstéttum sem skera hverja hliðargötuna á fætur annarri þannig að maður á hjóli sínu og útsjónarsemi líf að launa. En nei, í staðinn fyrir að reyna eitthvað að lappa upp á hjólaleiðina þá er hún bara skráð voðalega falleg á kort sem græn leið!

Jám, nenni ekki að rausa meira um þetta núna en geri kannski einhvern tíman seinna þegar mér nennist meira.

.... svo verð ég líklegast að fara að gera eitthvað með þetta blogg því mér sýnist að það sé eitthvað farið að daprast álesningini þar. Kannski á manns eigin bloggleti þar einhvern hlut að máli.

11. september síða

Samsæriskenningar á báða bóga

Var að þvælast á ljósmyndakeppni.is og þar var einhver með myndir frá 1. maí og þar var "kröfuspjald" með annarri dagsetningu eða 11. september. Á vefnum 11september.is eða aldeilis.net eru undarlegar vangaveltur um hvort Kanarnir sjálfir hafi staðið fyrir árásunum 11. september til að hvetja hverjir aðra til dáða gegn öllum hryðuverkamönnunum og öðrum glæpamönnum. Ég veit ekki og held nú eiginlega varla en þetta er samt vangavelta sem einhverjir velta eitthvað fyrir sér.

.... vá - það kom hjá mér svona hálfpartinn pólitískt blogg aftur eftir langt hlé á svoleiðis!

Kjalvegur - ég ann þér

Að passa ekki inn í rammann

Ég var á leiðinni að skrifa einhvern áróðuirspistil til að bjarga því sem bjargað yrði á Kili, ég hafði nefnlega ekki næga trú á landanum. En svo hafði ég ekki neinn tíma og í millitíðinni er víst komið í ljós að það hvorki ráðherrar né pöpullinn í landinu vill þennan veg þarna sem átti að fara að leggja þarna fyrir einhverjum tveimur viku, og já átti að leggja. Það á held ég ekkert að leggja hann lengur þessa vegarskömm sýnist mér eða það held ég. Minn áróðurspistill liggur því hér óbættur hjá garði og kemst hvergi enda vonandi ekki nein þörf fyrir hann lengur. Það lítur út fyrir að það sé Kjalvegur sem passar ekki inn í ramman!

En upphafið á honum hefði getað litið út einhvern veginn svona:

Eitt af því sem gerir Ísland að Íslandi er hálendi. Hálendi sem er öðru vísi en allt annað, öðru vísi en láglendið þar sem er fullt af fólki, þar sem er byggð og þar sem við höfum sem besta vegi. Á hálendinu er ekki mikil byggð og þar er yfirleitt ekki mikið af fólki og þar ætti ekki að vera nein þörf fyrir upphækkaða vegi - enda er hálendið allt öðru vísi. Þetta vita þeir sem þangað hafa komið.

... bloggfærsla kláruð 21. febrúar eða hvað veit ég hvaða dagur er í dag!

Norðurvegur - nei takk, ekki fyrir mig...

Vilja hefja undirbúning nýs vegar yfir Kjöl í einkaframkvæmd

Eflaust saka einhverjir mig um að vera bara þröngsýnan nöldursegg á móti öllu en þessi vegur yfir Kjöl (eða Sprengisand) sem ég hef heyrt um af og til er einhver al versta framkvæmd sem ég hef heyrt um. Mér rennur kalt vatn milli skinns og hörunds af tilhugsuninni einni saman. Bloggið mitt gæti núna breyst í pólitískt blogg bara út af þessu og víst er að ég á eftir að blogga um þetta meira.

Gerir fólk sér enga grein fyrir að hálendi án stórframkvæmda er einhver verðmætasta auðlindin sem íslendingar eiga og í mínum huga mikið verðmætari en tíminn sem það tekur að fara norður á Akureyri?

Meira um þetta seinna!

....