Enn einn hjólatúrinn

Um Reykjavík og nærsveitir

Bara einhver sem maður mætti

Æfingar fyrir 300km Vatnarúntinn halda áfram. Eftir 123 kílómetrana á sunnudaginn var bara nokkuð ljúft að fara alls tæpa 90 kílómetra.

Við fórum á bakaleið fram hjá gömlu Umbúðamiðstöðinni. Mikið ofboðslega var undarlegt að koma að einhverjum stað sem virkaði á mig eins og eyðibýli.

Hjólað á Mýrunum

122,8 km taldist hraðamælinum til (lengdarmetrar sko... ekki hraði)

Með Cruise Controlið við völd ...

Eftir að hafa þegið loft í boði Vatnamælinga les Veðurstofunnar við Grensásveg var okkur ekkert að vanbúnaði en að leggja af stað. Augnablik... mig langar í appelsín og prinspóló! Stoppað í Select en þar var allt of mikið af fólki og biðröð út úr dyrum þannig að það var bara next stop Hyrnarn í Borgarnesi. En augnablik aftur. Núna hafði prinspólóið breyst í pulsu en það skipti ekki máli því það var enn meira af fólki í Hyrnunni í Borgarnesi. Getur þetta fólk ekki verið heima hjá sér. Það mætti halda að það væri einhver sérstök ferðahelgi. Það var síðan sjoppa númer tvö í Borgarnesi sem reddaði málinu fyrir okkur. Pulsan í magann og svo var keyrt eitthvað rúma þrjátíu kílómetra út á Mýrar.

Rauða Eldingin aðeins að slaka á áður en ætt var inn í Borgarnes

Það gekk vel að keyra og svo líka vel að hjóla. Ég og rauða eldingin vorum að bonda þvílíkt vel saman í gegnum nýju hjólaskóna.

Snickers úti í vegakanti!

Eitthvað snakk í Olís í og svo var bara farið til baka aftur og náð í bílinn. Þar var étið eins og eitt brauð með túnfisksallati. Nei ekki ein brauðsneið heldur heilt brauð eða þarumbil. Og áfram var haldið lengra út á Snæfellsnes. Eitthvað var nú Rauðu Eldingunni farið að mislíka þetta og ákvað að slíta einn tein svona í mótmælaskyni. En ég hlustaði ekki á þetta röfl í hjólinu og ekki var snúið við fyrr en hraðamælar sýndu 95 km.

Breiðablik... þar sem bræður snéru við eftir 95 kílómetra

Það var mikil léttir að sjá álengdar yfirgefinn bíl úti í vegarkanti og ekki sálu neins staðar að sjá. Ég með bíllykil og fljótlega var Gunninn kominn líka og við á heimleið. 122,8 km lagðir af baki. Ég með meðalhraða 24,7 held ég á meðan hjólið var stigið. Ætli það sé ekki bara þolanlega ágætt eða hvað?

Vegalengd: 122,8km
Meðalhraði á meðan hjólað var hjá mér 24,7km/klst eitthvað
Mesti hraði: 62 km/klst líklega í brekkunni inn að Borgarnesi

Hvanni með Skýrr á uppstignardegi

Ég er blöðróttur með kramdar tær

Scarpa... Broddarnir utaná og blöðrurnar innaní

Það er finnst mér svona eftirá ekki neitt áhlaupaverk að fara á Hvannadalshnúk, arkandi upp á skíðaskóm. Fimmta ferðin mín þangað upp og e.t.v. sú erfiðasta. Sú fyrsta reyndar sem tók held ég 18 klst í rigningu þoku súld en líka sól var kannski erfiðust. En þessi tók töluvert á.

Frábær hópur og frábært skipilag hjá Ragganum Antoníusarsyni. Ég held að það sé ekkert á hverjum degi sem svona "einhver" sér um að koma 35 manna hópi upp á Hnúkinn. Reyndar ekki allir að fara í fyrsta sinn en samt svona rúmlega þriðjungur.

En ég var sem sagt alveg að drepast á leiðinni upp en skíðabrekkan á leiðinni niður var bara eðalsnilld.

Meiri myndir eru á myndasíðu Flickr.

Flott veður á leið niður af Hnúknum

Já og meðan maður man.
Það var ekkert sjáanlegt af sprungum fyrr en mjög ofarlega í brekkunni upp á öskjubarminn. Sprungur yfir Virkisjökli náðu ekki langt upp. Mjög lítið af sprungum til trafala í hnúknum sjálfum. Þær sem þurfti að fara yfir eða fara nálægt voru svo þrögnar að það var ekki nokkur leið að komast ofan í þær.

Gistum í Hörgslandi. Vaknað svona um kl. 2 um nótt. Lagt af stað til Sandfells fyrir kl. 3. Lagt af stað að ganga kl. 4:15. Komin upp fyrir kl. 12:30.
Lagt af stað niður kl. 13:00. Komin niður á bílastæði kl. 17:15. Sem sagt þá 13 klst. ferð fyrir okkur sem vorum skíðandi. Aðrir komu ekki mikið seinna niður. Þeir síðustu líklega rúmum klukkutíma seinna.

Eyjafjallajökull í engu skyggni

Það var lagt snemma af stað. 7:00 var planið og það gekk nokkuð eftir. Einhver talaði um allt að 30 manns en niðurstaðan var að við vorum líklega 24 sem lögðum af stað. Nokkrir aðrir hópar voru þarna líka þannig að allt í allt þá voru þetta um 70 manns á röltinu upp hlíðar jökulsins.



Allir voru vel sprækir þegar lagt var af stað og ormarnir liðuðust upp fjallið. Það var farið í línur sem fóru eitthvað mis hratt upp. Allir komust Skýrrar og félagar þeirra á toppinn utan einn sem þjáðist illilega af beinhimnubólgu.



Eitthvað um 10 tímar alls. 6-7 tímar upp og 3-4 tímar niður.

Steinninn færist neðar

Esjugöngur

Í vetur einhvern tímann komst ég að því að það var búið að umturna Esjunni. Steinninn sem var í einhverri viðráðanlegri hæð hafði verið færður upp brekkuna. Það átti að vera eitthvað markmið að komast upp að grjóthnullungnum á einum klukkutíma sem hefði átt að vera létt verk og löðurmannlegt ég enda vanur að fara þangað upp á innan við 50 mínútum. En í einhverjum kafaldsbil þá bar svo undarlega við að það var ekki nokkur leið að komast upp að þessum Steini nema þegar eitthvað var vel liðið á annan klukkutímann. Einhver hélt því nú fram að ég væri bara orðinn gamall en þeim hinum sömu get ég tilkynnt að þeir ráða hvort sé líklegra að ég sé að yngjast núna eða að Steindruslan hafi verið færð eitthvað niður brekkuna.

En sem sagt. 43:28 á mánudaginn síðasta og 42:35 held ég í gær. Þetta fer að fara niður fyrir 40 mínúturnar. Og þá fer maður nú líklegast að hætta sér líka alveg upp.

að vera ánægður og óánægður

Hjólatúr, kosningar, fuglamyndir og fyrirhugaðar framkvæmdir

Ég er ekki neitt sérlega ánægður með hnéð á mér og ekki heldur neitt sérlega ánægður með Rauðu-Eldinguna. Hnéð varð aumt og svo slitnaði teinn og gjörðin skekktist. En það var hjólað.

Eitthvað yfir 77 km á alls 4 klst en meðalhraði 23 komma eitthvað á meðan ég var að hjóla. Ekki hratt en sæmilega langt samt á minn mælikvarða.

Þarf að prófa hnéhlíf til að hnéð fari ekki svona í klessu. Svo þarf ég að henda hjólinu í þá hjá Erninum. Það er væntanlega ekki í lagi að það slitni teinn á sléttum vegi á nýju hjóli!

En jæja...
Það var kosið í gær. Ég ákvað mig ekki fyrr en á sekúndunni sem ég setti ex við eitthvað, segi ekki hvað en eftir á fattaði ég að ég hafði kosið í samræmi við sokkana mína!

En jæja aftur!
Fór í dag út á Seltjarnarnes. Þegar ég fór þar um á Rauðu-Eldingunni í gær sá ég einvern torkennilegan fugl.



Var þar komin margæs ef mér skátlast ekki þeim mun meira. Er bara nokkuð sáttur við myndatökuna. Held að myndin sé skárri en myndin sem er í fuglabókinni minni. Þarna voru líka flögrandi hettumáfar og er ég bara sáttur þar líka.



Og loks jæja...
Framkvæmdir. Það er komið á dagskrá að gera einhvern skjólgarð í garðinum hér á H34 þannig að ég geti sólað mig með einhverjum árangri núna í sumar.

Svo er ég líka pínulítið ánægður með sjálfan mig að þessar framkvæmdapælingar sem kölluðu áörlitla tiltekt í garðinum urðu líka til þess að í fyrsta skipti á æfinni er ég farinn að flokka eitthvað lífrænt rusl frá öðru rusli og ætla mér að búa til MOLD!

Nenniseggi eða hvað

Þegar maður á að vera að gera eitthvað annað er ágætt kannski að blogga bara

Vetur og sumar á sama degi

Þegar maður nennir ekki að gera það sem maður á að vera að gera er ágætt að blogga smá.

Við bræður fórum í Fellsmerkurtúr um páska. Lagt af stað eftir fiskát föstudagsins langa a la mama á Urðarstekk. Það var gott veður og útivist fram á miðnætti sitjandi og segjandi eitt en kannski ekki margt.

Svo á laugardegi var sólin í heiði alveg eins og veðurspámennirnir höfðu lagt til. Við örkuðum af stað upp Keldudalsheiðina. Það var komið sumar á láglendi og blómstur sprungin út en eftir því sem ofar dró varð vetrarlegra. Einhvers staðar í 500 metra hæð var frost að fara úr jörðu og ofar var snjór yfir öllu. Við enda komnir upp undir jökul.

Valaþúfa eða ekki Valaþúfa... víst er að þar fann ég beinvölu

Valaþúfa er þarna einhvers staðar og fórum við upp á hól sem okkur fannst flottur sem slíkur. Fann ég reyndar beinvölu þar uppi, líklega ættaða úr fugli sem einhver hefur étið einhvern tíman. En samkvæmt kortinu er Valaþúfan allt annars staðar og mikið austar. Verður farinn könnunarleiðangur þangað þegar vel liggur á manni.

Útsýni til jökla ofan af Valaþúfu eða ekki Valaþúfu. Fyrir þá sem eru ekki mjög kunnugir þá er jökullinn vinstra megin Eyjafjallajökull og jökullinn hægra megin Mýrdalsjökull.
Smella á myndina til að fá hana risastóra!

Það var gengið svo gott sem upp að jöklinum en samt ekki alveg á hann.
javascript:void(0)
Á bakaleiðinni lentum við í miklum Hremmingum við Hotsgil og einhver önnur gil. Höfðum ætlað að fara einhverja aðra leið til tilbreytingar niður aftur enn allar aðrar leiðir reyndust meira og minna ófærar.

Það er ágætt þetta þegar maður á að vera að gera eitthvað sem maður nennir eiginlega ekki að gera. Ekki get ég reyndar alveg kennt veðrinu um þar sem það er einhver þræsingur í honum [eða segir maður ekki þannig] svo það er best að blogga smá eða bara setjast einhvers staðar í ró og spekt og fara að prjóna sér peysu!